Na Mwandishi Wetu
WANAFUNZI wa Kiislamu wa shule za Msingi wataanza rasmi uvaaji wa sare ya shule yenye kuzingatia imani yao baada ya Afisa wa Elimu Jiji kusambaza barua kwa Maafisa wa Wilaya ukiwataka watekeleze maelekezo ya mkutano wao uliofanyika katika Ukumbi wa Karimjee Februari 20, mwaka huu.
Katika barua hiyo ya Machi 24, mwaka huu yenye Kumb. Na. DCC/W/23/52 Vol.1/6 ambayo gazeti hili lina nakala yake, Afisa huyo Bwana A.S. Mbegu ameambatanisha waraka wa Wizara ya Elimu wenye kuruhusu vazi hilo kwa wanafunzi wasichana wenye kutekeleza mafunzo ya dini yao.
Waraka huo wa Wizara wenye Kumb. Na. EDC.10/62/Vol. 417 wa Agosti 28, mwaka 1995 ulifuatia kauli ya Rais kuhusiana na vazi la Hijab lenye kuzingatia sare ya shule kwa wanafunzi husika.
Mkutano wa waalimu wakuu ukumbi wa Karimjee ulitoa ufafanuzi wa aina ya "hijab" itakayoruhusiwa mashuleni ambapo ukaazimia kuwa iwe ni sketi "ndefu" ya bluu, blauzi nyeupe mikono mifupi na mtandio mweupe.
Hata hivyo ufafaunzi huo huenda ukazua utata kwa wanafunzi kwani kwa mujibu wa maamrisho ya Uislamu mikono haitakiwi kuwa wazi isipokuwa viganja vyake.
|
|