Hii ndio ahadi unayofunga na Allah mara tu baada ya kutamka La ilaha illallah, na kwa kufanya hivyo unaufanya ulimwengu mzima shahidi juu yako. Ukiivunja ahadi hii, mikono na miguu yako, kila unywele wako, na kila chembe ya ardhi na mbingu ambavyo mbele zao uliweka ahadi, vitatoa ushahidi dhidi yako katika mahakama ya Allah ambako utakuwa kizimbani katika hali ya udhalili mno kiasi ambacho hutakuwa na hata mmoja wa kukutetea. Hutakuwa na wakili wala mwanasheria wa kukusaidia katika kesi yako.

Kwa hakika mawakili na wanasheria ambao katika mahakama za ulimwengu huu wanaifanyia istihzai na kuipotosha sharia kwa ajili ya maslahi ya kilimwengu, wao wenyewe katika mahakama ya Allah watasimama katika dhila kama wewe. Mahakama hiyo si ya kukuachia kwa ajili ya mbinu, udanganyifu au hila. Unaweza kuwaficha hatia zako polisi wa dunia, lakini katu huwezi kuwaficha chochote polisi wa Allah. Polisi wa dunia hupokea hongo na rushwa kinyume na polisi wa Allah. Mashahidi wa duniani wanaweza kutoa ushahidi wa uongo, lakini sio mashahidi wa Allah, kwani ni waaminifu sana mno kabisa. Watawala wa ulimwengu wanaweza kufanya dhulma, lakini Allah ni Mtawala Muadilifu Asiyefanya dhulma. Na tena hamna kuepa wala kutoroka katika jela ya Allah ambapo huwafunga wahalifu. Ni ujinga mkubwa na kwa hakika ni upumbavu mkubwa kuliko wote kumfanyia Allah ahadi ya uongo. Unapoweka ahadi hii, kwanza fikiri vizuri sana, kisha itekeleze kikamilifu, kwani hukulazimishwa shingo upande utamke shahada. Kwani maneno matupu hayana manufaa yoyote.